វិធានការមួយចំនួន ដើម្បីកាត់បន្ថយហានិភ័យនៃការបាត់បង់ជីវិតដោយយានយន្តនិងគ្រឿងចក្រតាមកសិដ្ឋាន
គ្រោះថ្នាក់បណ្តាលឲ្យស្លាប់ភាគច្រើនបំផុតនៅកសិដ្ឋានគឺពាក់ព័ន្ធនឹងយានយន្តឬគ្រឿងចក្រ។ ខាងក្រោមនេះគឺជាស្ថានភាពគ្រោះថ្នាក់ខ្លះដែលច្រើនកើតឡើង ហើយត្រូវប្រុងប្រយ័ត្ន ដោយស្វែងរកគន្លឹះសំខាន់ៗដើម្បីសុវត្ថិភាពពេលបញ្ជាយានយន្តឬគ្រឿងចក្រ។.
ប្រវត្តិ
បច្ចុប្បន្ននេះ គ្រោះថ្នាក់ដល់អាយុជីវិតនៅកន្លែងបំពេញការងារគឺជាបទឧក្រិដ្ឋក្រោមច្បាប់ស្តីពីសុខភាព និងសុវត្ថិភាពកន្លែងបំពេញការងារ។ ម្ចាស់កសិដ្ឋាន អ្នកគ្រប់គ្រង និងនាយកកសិដ្ឋានត្រូវធានាឱ្យបាននូវកន្លែងបំពេញការងារប្របកដោយសុវត្ថិភាពនិងសុខភាពល្អ- ប្រសិនបើមាននរណាម្នាក់ស្លាប់នៅកសិដ្ឋានរបស់អ្នក អ្នកអាចរងការកាត់ទោសក្រោមច្បាប់ថ្មីនេះ។
ច្បាប់ថ្មីនេះមិនធ្វើឲ្យមានការទទួលខុសត្រូវបន្ថែមនោះទេ គ្រាន់តែច្បាប់នេះចែងពីការដាក់ទោសកាន់តែធ្ងន់ប៉ុណ្ណោះ។ ប្រសិនបើអ្នកគោរពទៅតាមកាតព្វកិច្ចស្តីពីសុវត្ថិភាព និងសុខភាពកន្លែងបំពេញការងាររួចហើយ និងបន្តគោរពតាមកាតព្វកិច្ចនោះតទៅទៀត គឺអ្នកកំពុងធ្វើការបានត្រឹមត្រូវហើយ។ ប្រសិនបើអ្នកមិនគោរពតាម និងមិនគិតពីហានិភ័យកន្លែងបំពេញការងារទេ អ្នកនឹងរងផលវិបាកកាន់តែធ្ងន់ធ្ងរ។
មរណភាពភាគច្រើន (ប្រហែល 75%) នៅតាមកសិដ្ឋានពាក់ព័ន្ធនឹងយានយន្តនិងគ្រឿងចក្រ
គ្រោះថ្នាក់ដែលកើតមានជារឿយៗពាក់ព័ន្ធនឹងម៉ាស៊ីនត្រាក់ទ័រ ឡានដឹកទំនិញ ម៉ូតូកង់បួន យានយន្តនិងគ្រឿងចក្រផ្សេងៗ ទៀត
ក្រឡាប់ និងកិនសង្កត់
យានយន្តឬគ្រឿងចក្រអាចក្រឡាប់ និងកិនសង្កត់មនុស្សជាពិសេសក្នុងករណីដែលមនុស្សធ្លាក់ពីលើគ្រឿងចក្រឬយានយន្ត។
បុកពារពីលើអ្នកបើកបរ
រថយន្តអាចបុកពារអ្នកបើកបរ ពេលគេចាកចេញពីរថយន្ត។
បុកពារអ្នកផ្សេង
យានយន្តឬគ្រឿងចក្រក៏អាចបុកពារអ្នកផ្សេងផងដែរនៅពេលគេនៅក្រៅយានយន្តឬគ្រឿងចក្រ
ជាប់ការទាក់ថ្ពក់
មនុស្សអាចទាក់ថ្ពក់ជាប់នឹងឧបករណ៍ផ្សេងៗដែលភ្ជាប់ទៅនឹងម៉ាស៊ីន ជាពិសេសឧបករណ៍ភ្ជាប់ដែលដំណើរការដោយម៉ាស៊ីនគ្រឿងចក្រ។
គន្លឹះសំខាន់ៗដើម្បីសុវត្ថិភាពតាមយានយន្តនិងគ្រឿងចក្រ
- ថែទាំយានយន្តនិងគ្រឿងចក្ររបស់អ្នក ជាពិសេសពិនិត្យហ្រ្វាំង។
- គិតថាតើយានយន្តឬគ្រឿងចក្រអ្វីដែលសមស្របបំផុតនឹងការងារ។ អ្នកបញ្ជាយានយន្តឬគ្រឿងចក្រ និងប្រធានក្រុមការងារត្រូវគិតលើលក្ខណៈឬសណ្ឋានផ្លូវ និងស្ថានភាពធាតុអាកាស ឧទាហណ៍ យានយន្តឬគ្រឿងចក្រជាច្រើនក្រឡាប់នៅកសិដ្ឋានពេលបើកចុះចំណោត ឬកន្លែងចោតរអិល។
- អ្នកបើកគ្រឿងចក្រ គួរតែមានប័ណ្ណបើកបរត្រឹមត្រូវតាមច្បាប់ ហើយអ្នកត្រូវសង្កេតមើលថាតើគេអាចបញ្ជាយានយន្តឬគ្រឿងចក្របានដោយសុវត្ថិភាពឬទេ។
- ត្រូវធានាថាអ្នកបញ្ជាយានយន្តឬគ្រឿងចក្រអាចមើលឃើញមនុស្សនៅជុំវិញយានយន្តឬគ្រឿងចក្របានជាពិសេសនៅពេលបើកថយក្រោយ។
- កុំឲ្យកុមារទៅលេងរោងដែលទុកដាក់យានយន្តនិងគ្រឿងចក្រ។
- បំពាក់ឧបករណ៍ការពារអ្នកបើកបរលើម៉ូតូកង់បួនដើម្បីកាត់បន្ថយហានិភ័យនៃការកិនសង្កត់មនុស្សក្នុងករណីក្រឡាប់។
- ត្រូវមានការប្រុងប្រយ័ត្នជានិច្ច។ ប្រសិនបើអាច បញ្ឆេះម៉ាស៊ីនត្រាក់ទ័រតែនៅពេលមានអ្នកបញ្ជាអង្គុយលើកៅអីក្រោយចង្កូតប៉ុណ្ណោះ។ គ្រោះថ្នាក់ជាច្រើនកើតឡើងនៅពេលមនុស្សឈរចន្លោះកង់ត្រាក់ទ័រ ហើយចាប់ផ្តើមបញ្ឆេះម៉ាស៊ីនដោយគ្មានអ្នកអង្គុយលើកៅអីអ្នកបើកបរ ឬនៅពេលបញ្ឈប់ត្រាក់ទ័រដើម្បីទៅពិនិត្យអ្វីមួយ ឬទៅបើកទ្វាររបង។
- ចុះឡើងលើយានយន្តឬគ្រឿងចក្រដែលកំពុងតែធ្វើចលនាអាចបណ្តាលឲ្យមានគ្រោះថ្នាក់ធ្ងន់ធ្ងរ។ ចូរកុំចុះ ឬឡើងលើយានយន្តឬគ្រឿងចក្រដែលកំពុងធ្វើចលនា។
- កន្លែងណាដែលយានយន្តឬគ្រឿងចក្រអាចផ្អៀង ត្រូវពាក់ខ្សែក្រវាត់ដើម្បីកាត់បន្ថយហានិភ័យនៃការធ្លាក់ពីលើយានយន្តឬគ្រឿងចក្រ ហើយត្រូវគ្រឿងចក្រកិនសង្កត់។
- ត្រូវពាក់មួកសុវត្ថិភាពពេលបើកម៉ូតូកង់បួន ឬរថយន្តបើកតាមកសិដ្ឋាន។
- កុំផ្ទុកឬដឹកមនុស្សលុះត្រាតែយានយន្តឬគ្រឿងចក្រនោះមានកៅអីសម្រាប់ដឹកមនុស្សបាន។
- កុំឲ្យកុមារអាយុក្រោម 16ឆ្នាំបើកម៉ូតូកង់បួនសម្រាប់មនុស្សពេញវ័យ។
យានយន្តនិងគ្រឿងចក្រមិនមែនជាប្រភពតែមួយបែបនៃគ្រោះថ្នាក់នៅតាមកសិដ្ឋាននោះទេ. ការងារអ្វីក៏ដោយដែលអ្នក ឬបុគ្គលិករបស់អ្នកធ្វើនៅកសិដ្ឋាន ត្រូវគិតពីសុវត្ថិភាពជាចម្បង។ ចូរគិតថាអ្វីខ្លះដែលអាចធ្វើឱ្យរាំងស្ទះដល់ដំណើរការដែលបានគ្រោងទុក ហើយត្រូវធ្វើដូចម្តេចដើម្បីទប់ស្កាត់កុំឱ្យហេតុការណ៍នោះកើតឡើង។ ចូរពិភាក្សាជាមួយបុគ្គលិករបស់អ្នក និងចាត់វិធានការដើម្បីឱ្យប្រាកដថាអ្នកផ្តល់នូវកន្លែងបំពេញការងារប្រកបដោយសុវត្ថិភាព។
ភារកិច្ចផ្លូវច្បាប់ស្តីពីសុខភាព និងសុវត្ថិភាពនៅកសិដ្ឋានរបស់អ្នក
ក្នុងនាមជាកសិករ អ្នកអាចជាថៅកែដោយខ្លួនឯង ជួលកម្មករផ្សេងទៀត ឬចាត់ចែង និងគ្រប់គ្រងកសិដ្ឋាន។ ទោះស្ថិតក្នុងទម្រង់ណាក៏ដោយ ក៏អ្នកមានការទទួលខុសត្រូវលើផ្នែកសុខភាព និងសុវត្ថិភាពពេលបំពេញការងារដោយរួមទាំង ៖
- ត្រូវធានាថាកសិដ្ឋានរបស់អ្នកជាកន្លែងបំពេញការងារដែលមានសុវត្ថិភាព ដោយគ្មានហានិភ័យដល់សុខភាពចំពោះបុគ្គលិករបស់អ្នក
- ត្រូវធានាថាសកម្មភាពផ្សេងៗនៅកសិដ្ឋានមិនធ្វើឲ្យបុគ្គលណាមួយ (ឧ. គ្រួសារ បុគ្គលិក អ្នកម៉ៅការឬចុះកិច្ចសន្យាបំពេញការងារ ភ្ញៀវ) មានហានិភ័យដល់សុខភាព និងសុវត្ថិភាពឡើយ។
- ត្រូវធានាថាបុគ្គលគ្រប់រូបអាចចេញចូលកសិដ្ឋានដោយសុវត្ថិភាពដោយគ្មានហានិភ័យដល់សុខភាពពួកគេឡើយ (រួមទាំងអ្នកដឹកជញ្ជូនអីវ៉ាន់ដល់កសិដ្ឋានផង)
ព័ត៌មានបន្ថែម
- ឧបករណ៍ និងសៀវភៅណែនាំរបស់ WorkSafe អាចជួយអ្នករកមើលប្រភពគ្រោះថ្នាក់ទូទៅ ធ្វើការវាយតម្លៃពីហានិភ័យ ហើយបង្កើតនូវការគ្រប់គ្រងសមស្របសម្រាប់កសិដ្ឋានរបស់អ្នក។
- ចូរពិភាក្សាជាមួយអង្គការឧស្សាហកម្មកសិដ្ឋានរបស់អ្នកស្តីពីសុវត្ថិភាពតាមកសិដ្ឋាន។
- សិក្សាបន្ថែមពីច្បាប់ថ្មីស្តីពីគ្រោះថ្នាក់ដល់អាយុជីវិតនៅកន្លែងបំពេញការងារតាមគេហទំព័រ WorkSafe
- ដាក់ពាក្យសុំកម្មវិធីសំខាន់ចាំបាច់ដែលផ្ដល់ឱវាទពី សុខភាព និងសុវត្ថិភាពកន្លែងបំពេញការងារ ដោយរក្សាការសម្ងាត់ និងមិនគិតថ្លៃ ហើយអ្នកប្រឹក្សាយោបល់ផ្នែកសុវត្ថិភាពឯករាជ្យអាចចុះមកកសិដ្ឋានរបស់អ្នក។